រាជធានីភ្នំពេញ ៖ កម្លាំងសមត្ថកិច្ចកងរាជអាវុធហត្ថលើផ្ទៃប្រទេស កាលពីរៀលថ្ងៃទី១៥ តុលា ២០១៦ បាននាំខ្លួនមេក្លោងឈ្មួញឈើនៅភូមិភាគឦសាននៃប្រទេស មកកាន់សាលាដំបូងរាជធានីភ្នំពេញ។ ឈ្មួញឈើរូបនោះឈ្មោះ ហេង សុខនាង ហៅយាយព្រឿង ភេទស្រី អាយុ៥៧ឆ្នាំ ជនជាតិវៀតណាម អាសយដ្ឋានស្នាក់នៅភូមិរាជានុកូល សង្កាត់ និងក្រុងស្ទឹងត្រែង។ គួរបញ្ជាក់ថាយាយព្រឿង ជាឈ្មួញឈើដ៏ធំប្រចាំភូមិភាគឦសាន និងមានទីតាំងស្តុកឈើជាច្រើនកន្លែងនៅក្នុងខេត្តស្ទឹងត្រែង ត្រូវបានកម្លាំងក្រុមស្រាវជ្រាវព័ត៌មាន និងបង្ក្រាបបទល្មើសព្រៃឈើ របស់កងរាជអាវុធហត្ថលើផ្ទៃប្រទេស ធ្វើការឃាត់ខ្លួនកាលពីវេលាម៉ោង៤ទាបភ្លឺថ្ងៃទី១៣ ខែតុលា ឆ្នាំ២០១៦ នៅក្នុងបរិវេណសង្កាត់រដ្ឋបាលព្រៃឈើអូរពងមាន់ ខេត្តស្ទឹងត្រែង បន្ទាប់ពីមេឈ្មួញដ៏ធំរូបនេះ បានយករថយន្ត២គ្រឿង និងកម្មករ៧នាក់មានបំណងទៅរំដោះយកឈើ ដែលសមត្ថកិច្ចបង្ក្រាបចាប់ ហើយនាំយកទៅរក្សាទុក នៅក្នុងសង្កាត់រដ្ឋបាលព្រៃឈើអូរពងមាន់នោះ។
គួរបញ្ជាក់ទៀតថា កាលពីវេលាម៉ោង១២និង៣០នាទីព្រឹក ថ្ងៃទី១២ ខែតុលា ឆ្នាំ២០១៦ កម្លាំងក្រុមការងារស្រាវជ្រាវព័ត៌មាន និងបង្ក្រាបព្រៃឈើរបស់កងរាជអាវុធហត្ថលើផ្ទៃប្រទេស បានស្រាវជ្រាវរកឃើញគំនរឈើដ៏ច្រើន ត្រូវបានគេយកទៅលាក់ទុកនៅក្នុងដីចម្ការ ស្ថិតក្នុងភូមិឃុំ ស្រែក្រសាំង ស្រុកសៀមបូក ខេត្តស្ទឹងត្រែង។ ដែលឈើទាំងនោះ ជាប្រភេទឈើប្រណិត និងមានចំនួនដ៏ច្រើនត្រូវបានក្រុមការងារស្រាវជ្រាវព័ត៌មាន និងបង្ក្រាបបទល្មើសព្រៃឈើ សហការជាមួយរដ្ឋបាលព្រៃឈើ ដឹកជញ្ជូនឈើទាំងនោះយកទៅរក្សាទុកនៅសង្កាត់រដ្ឋបាលព្រៃឈើអូរពងមាន់តាំងពីរសៀលថ្ងៃទី១២ ខែតុលា រហូតដល់រំលងអធ្រាត្រ ឈានចូលថ្ងៃទី១៣ ខែតុលា ឆ្នាំ២០១៦ ទើបរួចរាល់ ដែលឈើទាំងនោះ មានចំនួន៦រថយន្តសាំយ៉ុង និង៦រថយន្តបែនដឹកដី។
បន្ទាប់ពីកម្លាំងសមត្ថកិច្ចកងរាជអាវុធហត្ថលើផ្ទៃប្រទេសចាប់យកឈើទៅរក្សាទុកនៅសង្កាត់រដ្ឋបាលព្រៃឈើអូរពងមាន់ ស្រាប់តែនៅវេលាម៉ោង៤ព្រឹកថ្ងៃទី១៣ ខែតុលា ឆ្នាំ២០១៦ ក៏មានវត្តមានយាយព្រឿង ថៅកែឈ្មួញឈើល្មើសច្បាប់នោះនាំកម្មករ៧នាក់ និងរថយន្ត២គ្រឿង ១គ្រឿងម៉ាកបាឡែន ពណ៌ស និងមួយគ្រឿងទៀតម៉ាកសាំយ៉ុង ចូលទៅរំដោះឈើ និងឡោមព័ទ្ធទៅលើកងកម្លាំងសមត្តកិច្ច ដែលកំពុងយាមនៅក្នុងទីតាំងនោះថែមទៀត។
ឃើញដូច្នោះសមត្ថកិច្ចបានធ្វើការឃាត់ខ្លួន យាយព្រឿង ក្នុងបទល្មើសជាក់ស្តែង ពោលគឺចង់រំដោះឈើនៅក្នុងបរិវេណរដ្ឋបាលព្រៃឈើសង្កាត់អូរពងមាន់។ ដោយឡែកកម្មករ៧នាក់ ត្រូវបានរត់គេចខ្លួនពីកន្លែងកើតហេតុ។ ពាក់ព័ន្ធនឹងករណីខាងលើនេះ យាយព្រឿង ចូលមករំដោះឈើ សង្ស័យមានអំពើឃុបឃិតគ្នាណាមួយ រវាងរដ្ឋបាលព្រៃឈើ ជាមួយនឹងយាយព្រឿង ខណៈឈើត្រូវបានរក្សាទុកនៅក្នុងសង្កាត់រដ្ឋបាលព្រៃឈើរួចរាល់ រួមទាំងចាក់សោ តែមានវត្តមានយាយព្រឿង ចូលទៅក្នុងបរិវេណជាមួយនឹងកម្មករ៧នាក់ ដើម្បីរំដោះឈើ ចំណុចនេះមានន័យថា មន្ត្រីរដ្ឋបាលព្រៃឈើប្រចាំការនៅទីនោះ អាចចាក់សោឲ្យក្រុមយាយព្រឿងចូល រួចខ្លួនបែរជាទៅសម្ងំដេកដើម្បីបំភ័ន្តសមត្ថកិច្ច។
មួយរយៈកន្លងទៅនេះ ក្រុមការងារស្រាវជ្រាវព័ត៌មាន និងបង្ក្រាបបទល្មើសព្រៃឈើរបស់កងរាជអាវុធហត្ថលើផ្ទៃប្រទេស បានបំពេញការងារដ៏សស្រាក់សស្រាំ ចុះស្រាវជ្រាវព័ត៌មាន និងបង្ក្រាបបទល្មើសព្រៃឈើ ដូចជាករណី ឈើជាច្រើនកំណាត់នៅក្នុងដីចម្ការ ស្ថិតនៅក្នុងភូមិ ឃុំស្រែក្រសាំង ស្រុកសៀមបូក គឺឈ្មួញយាយព្រឿង នេះតែម្តង បានយកទៅលាក់ទុកស្ទើរតែគ្រប់ទីកន្លែង ដែលធ្វើឲ្យសមត្ថកិច្ចពិបាកក្នុងការរុករក។ ពាក់ព័ន្ធទៅនឹងករណី ដែលយាយព្រឿង នាំកម្មករទៅរំដោះឈើនៅក្នុងបរិវេណសង្កាត់រដ្ឋបាលព្រៃឈើអូរពងមាន់នេះ មិនត្រឹមតែសង្ស័យថា ជំនាញរដ្ឋបាលព្រៃឈើរបស់លោក ឆៀង តុលា មានករណីឃុបឃិតគ្នាជាមួយយាយព្រឿង ប៉ុណ្ណោះទេ សូម្បីតែករណី រដ្ឋបាលព្រៃឈើប្រើប្រាស់រថយន្ត និងកម្មករមកដឹកជញ្ជូនឈើនៅក្នុងដីចម្ការខាងលើ ដែលក្រុមការងារស្រាវជ្រាវព័ត៌មាន និងបង្ក្រាបបទល្មើសព្រៃឈើប្រគល់ឲ្យក៏ត្រូវបានគេដឹងថា ជំនាញរដ្ឋបាលព្រៃឈើ បានយករថយន្ត និងកម្មកររបស់យាយព្រឿង មកធ្វើជាមធ្យោបាយដឹកជញ្ជូនឈើទាំងនេះ យកទៅរក្សាទុក និងសង្កាត់រដ្ឋបាលព្រៃឈើអូរពងមាន់ផងដែរ។
ការបង្ក្រាបបទល្មើសព្រៃឈើ និងឈានដល់ឃាត់ខ្លួនយាយព្រឿង ដែលជាឈ្មួញល្មើសច្បាប់ដ៏ធំនៅភូមិភាគឦសាន ត្រូវបានមជ្ឈដ្ឋានទូទៅមានការគាំទ្រចំពោះចំណាត់ការរបស់កម្លាំងកងរាជអាវុធហត្ថលើផ្ទៃប្រទេស ដែលខិតខំបំពេញការងាររបស់ខ្លួន រហូតទទួលបានលទ្ធផលជោគជ័យ។ ទន្ទឹមនេះផងដែរសមត្ថកិច្ចក៏បន្តនីតិវិធី បើកការស្រាវជ្រាវពីបញ្ហាមន្ត្រីរដ្ឋបាលព្រៃឈើ ថាមានពាក់ព័ន្ធជាមួយនឹងយាយព្រឿង ឈានដល់ការឃុបឃិត រំដោះឈើនៅក្នុងបរិវេណដែលខ្លួនគ្រប់គ្រងថែមទៀតនោះ។ យាយព្រឿង ក្រោយពីសមត្ថកិច្ចចាប់ឃាត់ខ្លួនត្រូវផ្ទេរស្ថាប័នតុលាការ គឺពីខេត្តស្ទឹងត្រែងមកសាលាដំបូងរាធានីភ្នំពេញវិញ ដូច្នេះហើយបានជានៅរសៀលថ្ងៃទី១៥ តុលា កម្លាំងកងរាជអាវុធហត្ថលើផ្ទៃប្រទេស បញ្ជូនយាយព្រឿងទៅកាន់សាលាដំបូង ដើម្បីធ្វើការសាកសួរ និងចោទប្រកាន់លើបទល្មើសជាផ្លូវការណ៍៕
ប្រភព៖ 